講到去東京自由行，好多人都會揀住新宿或者涉谷，但其實住喺山手線沿線嘅「五反田」先係性價比之王！今次同大家開箱星野集團旗下嘅 OMO5 Tokyo Gotanda by Hoshino Resorts。呢間酒店2024年開張，唔單止裝修走文青時尚風，最緊要係地點唔錯，坐山手線去涉谷只係 3 個站，可以避開極繁忙的大站，帶住小朋友及行李，非常值得考慮！
- ⭐ 酒店星級：⭐⭐⭐⭐🌗
- 💰 酒店房價：HK$1100起
- 📍 地址：〒141-0031 東京都品川区西五反田８丁目４−１３
酒店外觀/大堂
一上到去酒店，就會見到星野集團標誌性嘅型格設計。OMO5 五反田嘅定位係「閃爍夜景與美食天堂」，一入去就感受到嗰種好 Relax 嘅氣氛。
由酒店行去 JR 五反田駅只需 5 分鐘，附近生活機能強到爆，車站附近就有大家最愛嘅 Uniqlo、無印良品 (MUJI)，仲有一間開到好夜嘅驚安之殿堂 (Donki)，返酒店前最後衝刺買手信就最啱！如果你想探索下唔同路線，酒店後面就係東急池上線嘅「大崎広小路駅」，想去啲比較少遊客嘅地方探索吓都好快。
酒店大堂嘅「OMO Base」設計非常闊落，採光度十足，仲有好多關於五反田美食嘅介紹，就算喺度坐下睇下書都好 Chill。
酒店設施方面，大堂旁邊有個好大嘅Pet friendly空中花園。喺東京呢啲寸金尺土嘅地方，竟然有個咁闊落嘅露天空間，仲有埋綠化裝飾同流水設計，真係好難得。
酒店客房
而家帶大家睇吓最重點嘅房間！星野嘅設計一向好識利用空間，房入面有塌塌米元素，赤腳行都好舒服，入屋仲有位俾你擺好啲鞋，非常有日本屋企嘅感覺。
我今次住嘅房型真係超級滿意，兩張單人床擺得整整齊齊，床墊軟硬適中，行完成日街返嚟一覺瞓到大天光。牆上仲有啲得意嘅五反田主題插畫同掛架，將電視同雜物位設計得好有層次感。
最正嘅地方係大片落地玻璃窗，將東京城市景盡收眼底。窗邊仲設計咗個超長嘅 daybed 座位，可以喺度坐住睇風景、飲咖啡，甚至喺度整理行程都好爽！
衛浴空間方面亦都無馬虎，採用乾濕分離設計。洗手盆位設計得好靚，燈光充足，化妝或者刷牙都心情好啲。浴室入面仲有埋浴缸，行到腳攰返嚟浸返個熱水浴真係人生一大享受！
客房浴室
其他
酒店仲有好多貼心位，例如大堂有售賣特色手信同精品，仲會提供詳細嘅服務指南。如果你係食貨嘅話，佢哋仲有一張附近餐廳嘅推薦名單，照住去食就唔驚中伏！
如果你想了解多啲酒店嘅限定活動，大堂仲有好多推廣單張可以睇。例如夜晚有免費Sparkling wine等等。
最後畀個小貼士大家，雖然呢間 OMO5 離五反田駅只係 5 分鐘路程，而且沿線配套極好，但如果你真係極度懶，或者攞住好重行李完全唔想行路嘅話，你亦可以考慮吓住喺 JR 大森站上蓋嘅「JR 東日本大森 METS 酒店」，落車即到。不過，講到玩味同設計感，我個人都係推薦 OMO5 多啲！
總括嚟講，OMO5 Tokyo Gotanda 地點優越、價錢親民，加上星野集團嘅品牌保證，係近期去東京非常值得一住嘅酒店。快啲 Click 入下面條 Link 睇吓你出發嗰陣仲有無房啦！